“San Giuseppi e i virgineddi”: dalla raccolta della poetessa Matilde La Placa

Dal borgo più bello d’Italia, Petralia Soprana, la poesia della poetessa Matilde La Placa, dedicata a San Giuseppe:

O Gloriusu San Giuseppi
ppi ttia s’ accumincianu
novi jorna d’i preghieri
cu canti devoti ed inni di lodi.

A chíesa è china di xhiura gialli
ca sboccianu na to stasciuni
c’u la prima aria di la tantu attisa,
bedda primavera.

Quantu amuri c’è
ppi lu patriarca di la famigghia,
p’ù santu di lu travagghiu,
p’ù protetturi di lu campu,
di li spighi du frummientu
nostru oru sacru e priziusu coltivatu
cu lu suduri di la frunti
e cu la fatica di li vrazza.

A ttia s’ addumanna lu teneru pani
ppi mienzu di to figghiu nostri Signuri
offriennnuti ‘ndonu nu banchettu ranni
di ringraziamentu
ddunni picciriddi, ricchi,
umili ,viddani,
tutti s’assettanu
e mancianu vicini
u manciari tua puvirieddu:

lenticchi d’a terra cu á pasta
cuciuta cu u beddu xhaguru
ddu finucchieddu
ca’ crisci servaggiu na campagna
vasatu du suli,
un piezzu di pisci suttu sali
fattu gustusu cu cardi friuti
e n’ arancia frisca
jinchinu la panza,
donanu un sorrisu gratu
a ccu lu pranzu tua cu amuri
ha priparatu.

Veni spontaneo fari na vota susuti
nu sentitu signu di la cruci
fattu ccu fedi e sintimientu
dinnanzi all’altari a ttia cunzatu
chinu d’ ì tanti panuzzi binidiciuti
ca ricordanu lu to mistièri.

Tu strinci amurusu lu tò Bamminu,
ni fa capiri quantu po esseri ranni
l’amuri d’un veru patri
e nuatri ca simu puri tanti to figghi
toccamu lu pedi sutta la to vesti
spiranzusi,
affidannu a ttia
tutti nuatri, u travagghiu
e i nostri carusi.

Matilde La Placa